Մարինա Աբրամովիչը՝ Women in the Arts 2015 մրցույթի հաղթող

Ամեն տարի աշնանը Բրուկլինյան թանգարանը հայտարարում է «Կանայք արվեստում» մրցույթը: Այն գործում է 2002 թվականից.: Մրցույթում հաղթում է նա, ով այդ տարի արվեստում բավականին ձեռքբերումներ է ունեցել: Այս տարի հաղթող է ճանաչվել հայտնի կին արվեստագետ Մարինա Աբրամովիչը (Women in the Arts):

Մարինան ազգությամբ սերբ է: Նա հայտնի է փերֆորմանսի բնագավառում: Թեև իր փերֆորմանսների մեծ քանակությանը՝ նա դեռ շատ գաղափարներ ունի, որոնց նպատակը հիմնականում ոչ արվեստագետ դիտողին արվեստի պրոցեսի մեջ ներքաշելն է:

Դե եսիմ՝ Գ. Ն.

Պատահաբար գտնվել է Ռեմբրանդտի նկարներից մեկը

Նյու-Ջերսիի աճուրդներից մեկում օրերս անհավանական բարձր գնով մի նկար է վաճառվել: Այն բավականին մեծ հետաքրքրություն է առաջացրել, քանի որ վաճառվել է նախատեսված գնից մոտ հազար անգամ ավելի թանկ՝ 870 000$: Որոշ մասնագետներ կարծում են, որ դա պատկանում է Ռեմբրանդտի վրձնին և որ նկարիչն այն նկարել է իր ուսանողական տարիներին: Այդ պատճառով էլ ձեռագիրն այդքան էլ նկատելի չէ:Խոսքը «Հինգ զգացմունքներ» շարքի նկարներից մեկի մասին է:

Ռեմբրանդտ վան Ռեյն. «Բույր» /12,5х10/

Ստեղծագործության գնորդը եղել է Մեծ Բրիտանիայից: Նրա մասին այլևս ոչնիչ հայտնի չէ: Նկարում պատկերված է գիտակցությունը կարցրած մի երիտասարդ կին, որին փորձում է ուշքի բերել թաշկինակը ձեռքին մի տարեց տիկին: Ուշագնաց կնոջ կողքին իր ամուսինն է: Նկարը վերնագրված է «Բույր» («Smell»): Ունի 12,5х10 դյույմ չափեր: Այս շարքից հայտնի են ևս երեք նկարներ՝ «Տեսարաններ վաճառողը», «Վիրահատություն» ու «Երեք երգիչներ»:

Դե եսիմ՝ Գ. Ն.

Ժամանակակից արվեստի նոր թանգարան Լոս-Անջելեսում

The Broad Museum-ը Էդիթի և Էլի Բրոդի մասնավոր թանգարանն է, որը բացվել է օրերս Լոս-Անջելեսում: Կանայք արվեստի սիրահարներ ու նվիրյալներ են: Նրանք որոշել են իրենց ունեցած գումարը ներդնելով սիրելի զբաղմունքի մեջ՝ քաղաքի իրականությունում ավելացնել ևս մեկ մշակութային կենտրոն՝ ամերիկացիներին պարգևելով նոր գեղագիտական հաճույք: Շինությունն ամբողջությամբ կառուցված է երկաթբետոնով ու մետաղյա կարկասով:

Լոս Անջելեսը լուսավոր քաղաք է: Diller Scofidio + Renfro ընկերության ճարտարապետները որոշել են առավելագույնս օգտագործել այս փաստը: Շենքը կառուցված է այնպես, որ օրվա լուսավոր ժամերին լուսավորությունը ստանում է արևի լույսից:

The Broad Museum-ն ունի շուրջ 2000 ցուցանմուշ. բազմազան քանդակներ, նկարներ, ինստալյացիաներ, լուսանկարներ ու վիդեո-արտեր, որոնք ներկայացնում են ժամանակակից արվեստի լայն ու ընդգրկուն տեսականին: Թանգարանում են այնպիսի հայտնի արվեստագետների գործերը, ինչպիսիք են Կարա Ուոքերը, Ջասպեր Ջոնսը, Ռոյ Լիխտենշտեյնը, Էնդի Ուորհոլը, Ջեֆ Կունսը, Ռոբերտ Ռաուշենբերգը, Բարբարա Քրյուգերը, Ջոն Բալդեսսարին և այլք:

Դե եսիմ՝ Գ.Ն.

Պիկասոյի "Ալժիրցի կանայք" վաճառվեցին 179 մլն ԱՄՆ դոլարով

Մայիսը կարծես թե ռեկորդային աճուրդների ամիս է: Մայիսի 11-ին Christie’s աճուրդի տան կազմակերպած հերթական աճուրդներից մեկում ռեկորդային գնով վաճառվել է Պաբլո Պիկասոյի “Ալժիրցի կանայք. Տարբերակ О” ստեղծագործությունը:  Անհայտ անունով գնորդը նրա համար վճարել է  179 մլն դոլար:

Նկարը ստեղծվել է 1955 թվականին և համարվում է այս թեմայով արված 15 աշխատանքներից մեկը: Այս ստեղծագործությունը վերջին անգամ աճուրդի է հանվել 1997 թվականին: Այն գնվել է 32 մլն դոլարով:

Պաբլո Պիկասո-“Ալժիրցի կանայք. Տարբերակ О”

Հնարավոր է, որ մեծ իսպանացու “Ալժիրցի կանայք. Տարբերակ О” կտավը դառնա Christie’s աճուրդի երբևէ ամենաբարձր արժեքով գնված ստեղծագործությունը: 

Նյութը  պատրաստեց Արև Ալեքսանյանը

Վան Գոգի կտավը վաճառվել է 66,3 մլն դոլարով

Օրերս Նյու Յորքի Sotheby’s աճուրդում 66,3 մլն ԱՄՆ դոլարով վաճառվել է Վինսենտ Վան Գոգի “Ալիսկամպի արահետը” կտավը: Նկարի համար պայքարել է հինգ գնորդ: Արդյունքում այն “բաժին է հասել” մի ասիացու, որի անունը դեռևս չի հրապարակվում: Նկարը վաճառվել է ռեկորդային գնով, սակայն այն վան Գոգի վաճառված նկարներից առաջին ռեկորդներից չէ: Դեռևս 1990 թվականին նրա “Բժիշկ Գաշեի դիմանկարը” Christie’s-ում գնվել է 82,5 մլն-ով: Փոխարենը, “Ալիսկամպի արահետի” գինը գերազանցեց 2014 թվականին վաճառված “Նատյուրմորտ. Ծաղկաման երիցուկներով և կակաչներով” կտավին, որը դարձյալ Sotheby’s աճուրդի մեծ տանը վաճառվել էր 61,8 մլն դոլարով:

Հայտնի է, որ “Ալիսկամպի արահետը”  կտավի  նախկին տերը այն գնել էր 2003թ. Christie’s աճուրդում`  11,8 մլն դոլարով:

Վինսենտ վան Գոգ-Ալիսկամպի արահետը

Sotheby’s-ի հերթական աճուրդին ներկայացված են եղել 64 արվեստի գործեր, որոնցից 50-ը գտել են իրենց նոր տերերին: Վաճառված բոլոր նկարները միասին կազմում են 368,3 մլն դոլար:

Նյութը պատրաստեց Զառա Սիմոնյանը

Ժամանակակից Վարշավան ակվարելներում

Ակվարելի վարպետները ներկայիս արվեստի դաշտում շատ են: Վարշավացի տաղանդավոր ճարտարապետ ու նկարիչ Տիտուս Բրժոզովսկին հայրենի քաղաքի հանդեպ տածած սերն ու կապվածությունն արտահայտում է ակվարելների միջոցով: Նկարիչն իր տպավորություններն ու տրամադրությունը հանձնում է թղթին` մի քանի րոպեով մեզ ևս դարձնելով իր քաղաքի բնակիչ: Իր նկարներում նա փորձում է ցույց տալ Վարշավայի աղմուկը, փողոցները, հասարակական կառույցները, եկեղեցիներն ու տները: Տիտուսի աշխատանքներում բնանկարներ կամ նատյուրմորտներ չկան: Նա նկարում է միայն ճարտարապետական կառույցները, ինչը, իհարկե, գալիս է իր մասնագիտությունից:

Բրժոզովսկին ռեալիստ նկարիչ է, սակայն իր նկարներում հանդիպում են նաև ֆանտաստիկ, ոչ իրական մոտիվներ, որոնք Վարշավան ու Տիտուսի արվեստը դարձնում են առեղծվածային: Դիտեք ինքներդ.

 Նյութը պատրաստեց Արև Ալեքսանյանը

Վենետիկի բիենալեի 50 000 բանալիները."The Key in the Hand"

Արվեստային դաշտում  վերջին օրերին, թերևս, Վենետիկի բիենալեից առաջնային իրադարձություն չի գրանցվել: Միջազգային այս մրցույթն անցկացվում է արդեն 56-րդ անգամ, ու մասնակցություն ունենք նաև մենք` հայերս: 18 սփյուռքահայ արվեստագետներ ներկայացրեցին <<Հայություն>> (Armenity) խորագրով ցուցադրությունը, որի արդյունքում, ինչպես հաղորդում է The New York Times-ը, մենք, որպես լավագույն ազգային տաղավար, արժանացանք <<Ոսկե առյուծ>> մրցանականին:
Դե եսիմ...-ն իր ընթերցողին է ներկայացնում բիենալեի  ճապոնական տաղավարում ցուցադրվող ինստալացիան:

Դիմացինին հասկանալու համար պետք է ունենալ նրա սրտի բանալին: Այս մտքով է առաջնորդվել ճապոնացի հայտնի նկարչուհի Չիհարու Շիոտան իր հերթական ինստալացիաներից մեկը ստեղծելիս: Այն իրենից ներկայացնում է երկու հին նավակների վերևում կախված 50 000 բանալիներ` կապված կարմիր թելերով: Ինստալցիան նկարչուհին անվանել է <<Բանալին ձեռքում է>>  ("The Key in the Hand"):

Նկարչուհու նպատակն է  հիշեցնել, որ կյանքում ամեն ինչ փոխկապակցված է, նույնիսկ մարդկային ճակատագրերը: Սենյակում տեղադրված նավերը հենց սա են խորհրդանշում: Միմյանց  հազարավոր թելերով կապված մարդիկ անկախ հեռավորությունից միշտ լի են հիշողություններով, որոնք մեկ մոռացվում են, մեկ հանգիստ չեն տալիս:

Այս աշխատանքը, կարելի է ասել, ստեղծվել է հազարավոր մարդկանց կողմից, քանի որ նկարչուհին համացանցով հայտարարություն է տվել, որ իրեն անհրաժեշտ են տարբեր չափերի բանալիներ: Արդյունքում ինստալացիայում տեղ են գտել երկրագնդի ամենատարբեր անկյուններից ուղարկված  50 000 բանալիներ:

Նախագծի հեղինակի խոսքերով` բանալիները ցանկացած մարդու կյանքում արժեքավոր են: Չէ որ նրանք պահպանում են ոչ միայն մեր ունեցվածքը, այլև մեր սիրելի մարդկանց: Բանալիները կարող են բացել մեզ համար անճանաչելի ուղիներ ու նոր հնարավորություններ: Նրանք կարող են փակել մեր սրտերը` այնտեղ թողնելով ինչ-որ մեկին կամ նրա հետ կապված հիշողությունները: Նախքան ինստալացիայի մաս դառնալը նրանք օգտագործվել են ինչ-որ մեկի կողմից: Այստեղ ամեն ինչ լի է հիշողություններով,-ասում է երիտասարդ նկարչուհին:

Նա հուսով է, որ Վենետիկի 2015թ. բիենալեի այցելուները գոնե մի պահ կմտածեն իրենց հիշողությունների, ու արդեն մոռացած բանալիների մասին…

 Նյութը պատրաստեց Զառա Սիմոնյանը

Ճապոնիայի կոյուղիների "արվեստային" կափարիչները

Փողոցային արվեստն իրոք հասել է իր զարգացման գագաթնակետին: Ճապոնիայում այժմ նույնիսկ կոյուղիների կափարիչներն են արվեստով լեցուն: Բանն այն է, որ անհայտ մի նկարիչ  Ճապոնիայի մի շարք քաղաքների կոյուղիների մետաղե կամ թուջե կափարիչների վրա հետաքրքիր պատկերներ է նկարում: Դրանք տարբեր բովանդակություն ունեն` գեղեցիկ ծաղիկներ, կենդանիներ, թռչուններ, ճապոնական ճարտարապետությանը բնորոշ կառույցներ և այլն: Քանի որ այդ կափարիչները հիմնականում շրջանաձև են, պատկերներն այնպես են նկարված, որ դիտվեն բոլոր կողմերից: Հանդիպում են նաև ուղղանկյունաձև կափարիչներ, որոնց վրա ճապոներեն գրություններ են և այլ նկարներ: Թվում է, թե նկարների մի մասն արված է բառելիեֆի տեխնիկայով, սակայն իրականում անհարթությունները հենց մետաղի մակերեսի վրա են: Նկարիչը դրանք պարզապես տարբեր գույներով է ներկել: Լուսանկարիչ Ֆաբիեն Պարսեն վերջերս եղել է Տոկիոյում, Օսակայում, ինչպես նաև Ճապոնիայի այլ քաղաքներում ու լուսանկարել իրեն հանդիպած փողոցային արվեստի այս նոր նմուշները:

 Նյութը պատրաստեց Զառա Սիմոնյանը

Կորեացի նկարիչների իլյուզիաները Մանիլայի 3D-թանգարանոմ

Ֆիլիպինների մայրաքաղաք Մանիլայում 3D-թանգարան է բացվել: Եթե շատ թանգարններում արգելվում է ցուցադրվող նմուշներին ձեռքով դիպչել կամ նկարվել, ապա այս թանգարանը ստեղծվել է հենց մյուսներում ընդունված օրենքները շրջանցելու համար: 3D նկարներին կարելի է ձեռք տալ, նկարվել դրանց հետ, նույնիսկ դրանց մեջ… Ստորև ներկայացված նկարները նայելով գլխի կընկնեք, թե խոսքն ինչի մասին է:) Թանգարանը ստեղծողներն իրենց ունիկալ կառույցին տվել են “Art in Island” անվանումը: Ներկայիս արդեն մշակութային կառույցի տարածքում նախկինում ավտոբուսների կայարան է եղել:

Կորեայից հրավիրված 18 նկարիչներից 4 ամիս է պահանջվել թանգարանի պատերը նկարներով ու որմնանկարներով “լցնելու” համար: Ցուցադրված է 50 ինքնատիպ աշխատանք` տարբեր թեմաներով ու բովանդակությամբ: Եռաչափ աշխատանքները հիացնում են իրենց չափերով ու ռեալիստականությամբ: Դրանք ստեղծում են խորության խաբկանք: Նրանց նայելիս թվում է, թե կարող ես ինքդ հայտնվել նկարում: Հենց սա է եղել 3D-թանգարան ստեղծողների հիմնական նպատակը. Այցելուներին որոշ ժամանակով հեռացնել իրականությունից, արվեստի միջոցով տանել ցանկացած այլ վայր` հին Եգիպտոսում, ինչ-որ մի ծովի ալիքների մեջ, կոկորդիլոսի բերանում, վան Գոգի նկարում և այլն... 

Թանգարանի ողջ հավաքածուն տեսնելու ու աշխատանքների հետ նկարվելու համար այցելուներից կպահանջվի մոտ երեք ժամ: Նկարները դիտելիս չմոռանաք, որ ընդամենը տեսողական խաբկանք է, իսկ Մանիլայում լինելիս  չմոռանաք այցելել կորեացի նկարիչների կողմից ստեղծված իլյուզիաների աշխարհ:)

Նյութը պատրաստեց Զառա Սիմոնյանը