2008թ. Գյումրու նախկին մանկական երկաթուղու տարածքում կառուցվում է Սբ. Սարգիս մատուռը: Այն գտնվում է Սև ղուլից քիչ հեռու, հավանաբար նախկին Սբ. Ալեքսանդրա եկեղեցու շրջակայքում: Մատուռը տեղակայված է «Ոսկե բլուր» ռեստորանային համալիրին պատկանող բակում: Եկեղեցին օծվել է 2011թ.: Շինարարական աշխատանքներն իրականացվել են Արտաշես Սարգսյանի միջոցներով: Փոքր չափերի մատուռը Գյումրու վերջին հայկական պաշտամունքային կառույցն է: Մատուռի հյուսիսային պատին փակցված ցուցանակի վրա հետևյալ արձանագրությունն է` «Ի հայրապետութեան ՏՏ Գարեգին Բ կաթողիկոսի Ամենայն հայոց և յառաջնորդութեան Տ. Միքայէլ եպս. Աջապահեանի կառուցաւ մատուռս յանուն Ս. Սարգսի զօրավարին արդեամբք և ծախիւք Արտաշէս Սարգսեանի ի թուին հայոց ՌՆԾԶ և յամի տեառն 2007»:
 |
| Գյումրու Սբ. Սարգիս մատուռը |
Վերջին տարիներին Սբ. Սարգիս զորավարի
անունով Հայաստանի
տարածքում ևս մի քանի փոքր եկեղեցի-մատուռներ են կառուցվել: Դրանցից են Գեղարքունիքի
մարզի Ծաղկունք
գյուղի և Աշտարակի Սբ. Սարգիս եկեղեցիները:
Մարզերում կան նաև զորավարի
անունով օծված մատուռներ, որոնք մեզ են հասել կիսավեր վիճակում: Սրանցից է Լոռու մարզի Արևածագ գյուղի Սբ. Սարգիս մատուռը:
Թվարկված պաշտամունքային կառույցների մեջ Գյումրու Սբ. Սարգիս եկեղեցին
առանձնանում է իր ճարտարապետական պարզությամբ: Իր չափերով և պարզությամբ այն նման է Աշտարակի Սբ. Սարգիս մատուռին:
 |
| Աշտարակի Սբ. Սարգիս մատուռը |
Գյումրու
Սբ. Սարգիսը զուրկ է քանդակներից և շքեղ ճարտարապետական տարրերից: Այն լուծված է պարզ և լակոնիկ: Կառույցը
լուսավորվում է թմբուկին և երկու պատերին տեղադրված փոքր, նեղ լուսամուտներով: Ներքին ոչ ընդարձակ, քառակուսի
տարածությունը միանման լուծված ճակատներով,
ներսի զարդարանքով,
ենթարկվում է գմբեթատակ տարածությանը`
փոքր չափերով հանդերձ ստեղծելով
միստիկ, հոգևոր միջավայր: Շինարվեստի,
շինարարական նյութերի
տեսանկյունից` սա կարելի է համարել մերօրյա Գյումրուն միանշանակ
համապատասխան եկեղեցի:
Այսօր քաղաքը լցվում է օր օրի վեր բարձրացող
դեղնավուն տուֆով կառուցված շինություններով: Քարի նշված գույնով է կառուցված Սբ. Սարգիս մատուռը ևս:
Գոհար Նավասարդյան
հատված դիպլոմային աշխատանքից
թեմա` «Գյումրի քաղաքի հայկական եկեղեցիների
ճարտարապետությունը»
Комментариев нет:
Отправить комментарий